النصائح الذهبية للبنت العصرية

بعد ما قريت الوصايا الذهبية اللى كتبها أحمد شقير على البلوج بتاعه، قلت لنفسى: ما تكتبى يا بت يا ليلو نصائح لإخواتك البنات ، اشمعنى يعنى أحمد ينصح الرجاله، صحيح أنا لا متجوزة ولا حاجه بس أهو أحب أفتى

النصيحة الأولى: الرجالة مش بيفهموا فى المكياج، فلو عايزة تفهميه ان جمالك ده وبشرتك التحفة دى كله طبيعى مفيش مشكلة، المهم اثبتى على شكل وألوان معينه ولا ون كبيره حيقولك ان شكلك متغير شوية لو عملتى أى حاجة جديدة

النصيحة الثانية: لو كنتى تعبانه أو عيانه متقوليلوش، لأنهم بيتخضوا ويتلبخوا ويتعصبوا عليكى من قلقهم عليكى وهما مش عارفين يتصرفوا، فريحى دماغك ودماغه ومتقوليش انك عيانه ، ولو لاحظ قوليله ماتخدش فبالك

النصيحة التالتة: أوعى ترغى كتير وهو تعبان أو راجع من الشغل مش طايق نفسه، حاولى تمسكى نفسك من الرغى ولا ونى عارفه انه صعب علينا، بعد ما يرتاح وياكل وينام ابقى ارغى براحتك يا ستى، حتى لو مكانش عاجبه رغيك ساعتها، فعلى الأقل مش حيتعصب عليكى

النصيحة الرابعة: لو عايزاه يبقى شيك قوى عشان مناسبة معينة، اختاريله انتى يلبس ايه ومتسيبيش الموضوع للمفآجأت، لأنك لو قولتيله مثلاً ان القميص مش لايق عالبنطلون ده، ممكن يقولك هو كده مش حغير هدومى، أو يقولك مش رايح خالص

النصيحة الخامسة: بلاش الغيرة اللى ملهاش لازمة عشان هو خلاص انتص فى نظره واختارك تكونى خطيبته أو مراته، مش لازم تفكريه كل ساعه بغلطته دى

النصيحة السادسة: لازم ولابد أن يوم التنضيف مايبقاش موجود فى البيت، دى مافيهاش هزار لأن الاضرار وخيمة، التنضيف والراجل فى البيت بيجيب نكد اسمعى كلامى

النصيحة السابعه والأخيرة: كلمات حاضر وطيب وعندك حق بتفرحهم أوى، قولي من ده كتير

وربنا يوفق الجميع