رمضان بقى ومسلسلاته... من كام سنة وانا مش مهتميه بأى حاجة بتتعرض فالتليفزيون، ولا بتابع أى مسلسل
انما السنادى، أول مرة مسلسل يشدنى، و طلع اننا بنعرف نعمل حاجة عليها القيمة أهو
مسلسل "قضية رأى عام" بتاع يسرا، مصدقتش فى الأول اننا لسه عندنا حاجة مش هايفة ولا مستفزة نعرضها فى المسلسلات، أخيراً كلام جد مفيد وبيقول حاجة
ببساطة مسلسل فعلاً مهم وبيناقش مش بس قضية الاغتصاب ، انما بيناقش كل عيوب وتخلف مجتمعنا، واننا مهما ظهرنا متحضرين ومتفتحين، لسه كل اللى جوانا زى ماهو زى أجدادنا
أحلى حاجة فى المسلسل انه جاب ردود أفعال أسر كل ضحية على حسب بيئتهم ومستواهم، بس المشترك بينهم انهم كلهم اعتبروا المغتصبة دى عار وفضيحة ولازم يتكتم عليها، ممنوع نبلغ البوليس لحسن نتفضح!! وكأن المجنى عليه هو الجانى
رد الفعل الطبيعى ماكنش الغضب من الجانى، انما كان ان العار طال العيلة، وكأن متقبل ومتوقع ان سلوك زى ده يحصل، انما كل المشكلة انه يحصل لحد من أهلى، من بيتى
كل بلاوى مجتمعاتنا طلعت فى المسلسل، بجد مبسوطة ان لسه فى ناس بتفهم وبتعمل حاجة ليها قيمة
تابعوا المسلسل
;)
