هى كدة كدة أكبر منك

طب ما هى الدنيا كده كده أكبر منك، ازاى بس عايز تحصرها كلها عندك؟ دانتا لو اتحركت شوية بره دايرتك الصغيرة وطلعت على أول الدنيا حتلاقى حاجات عمرك ماشوفتها ولا سمعتها، حتلاقى بشر مانتاش فاهمهم، لغات عمرك ماسمعتها وأماكن متعرفش انها موجودة، بلاش بقى تصغر مخك وحياتك وتحاول تمسك شوية هوا فى ايديك وتقول أهو، كله معايا فى ايدى أهو
هى كدة كدة أكبر منك، ازاى عايز تمشيها على رأيك؟ عاوز اللى حواليك يصقفوا ويمشوا على نهجك، طب تيجى ازاى، مانتا واحد من ألوف، ألوان وأشكال مالها عد، كل واحد ليه أحلامه وأوهامة وغلطاته، تيجى انت وتزنقها كلها فى راسك؟ هى حتكفى ايه ولا ايه... وسعها على نفسك وبلاش المخ الناشف، عشان هى كده كده أكبر منك