1.6.08

فى مسألة الجواز 2

أنا عجبتنى الكتابة فى الموضوع ده بصراحة
:)))
كتير قالولى ان الأسباب اللى فى المقال اللى فات مش هى كل حاجة
ما هو طبعاً فى أسباب أكتر لمشاكل الجواز
طبعاً أشهرها المسائل المادية
المشكلة ان الجواز عبر السنين كان دايما وسيلة فك عقد أو اعلان انتصار معين أو انتقام، أو ببساطة منظره
العريس جاب شبكة بكام، والفرح اتكلف اد ايه، واتعمل فين
بلا هم
كل ده ملهوش لازمة فعلاً وضياع فلوس ومجهود وأعصاب
مجرد تمسك بمظاهر غبية وعقد مقارنات بين العائلات
وتسمع جمل بقى زى: ده العريس جابلها شبكة ب25 ألف جنيه
ايه قيمة حجر بيلمع فى صباع بنت واحدة، وفى ناس جوازها كله ميتكلفش المبلغ ده؟
ينفع بايه الحجر ده، ولا عفش الشقة، والسفرة أم 30 ألف، لما الزوجة تبقى قاعدة تبكى فى البيت لوحدها ومتلاقيش ايد حنينة تمسح دموعها، والبيه مثلاً سهران مع أصحابه؟
ينفع بايه ده لما تبقى الزوجة عينيها فى وسط راسها وعلطول عايشة فى قلق عشان جوزها كل يوم ليه قصة مع غيرها
الناس خلاص بقت تاخد كل ما هو تافه وتحطه فى المقدمة، وكل ما هو مظاهر عبيطة وتعتبره هو ده الجواز
بس فى ناس بتعتبر الزنقة اللى بيحطوا فيها العريس دى دليل على جديته وانه مش ناوى يبيع بسهولة
ويكع ياعينى الراجل ويبقى نفسه يعمل كل حاجة زى ماهما عاوزين، ويتجوز فعلاً، وبدل بقى ما يريح باله، ويبقى سعيد، يفاجأ بأن مطالب الهانم مبتخلصش، ولو قال لأ، يلقى البوز المتين متصدر الشاشة
والبنت طول الوقت حاطة عينيها على أصحابها وجيرانها وقرايبها
سافروا فين، جابو ايه، عربيتهم شاكلها ايه
وتنسى
تنسى يعنى ايه جواز وعشرة واتنين بقوا واحد
ليه الانسان يقرف نفسه وينكد على روحه؟
مش جوزك (أو مراتك) النص التانى
يعنى لو نكدت على نصك التانى، حتبقى مبسوط؟
ليه البنت نسيت انها فاكهة البيت، اللى تطبطب وتدلع
وليه الراجل مابقاش قد المسئولية؟ العامود اللى الأسرة كلها تتسند عليه
ونرجع نقول مفيش رجالة عدلة، مفيش بنات
ماهو لا البنات فاهمين ازاى يبقوا بنات
ولا الرجالة فاكرين ايه الرجولة
الجواز مش سوليتير ولا فرح فى فندق
لو يقدروا يعملوا الكلام ده، جميل
بس مش ده الهدف
الهدف هو شركة طول العمر
هو حب يجمع الطرفين، والأسرتين
هو بيت يتبنى بالحب والأمل
ده مش كلام أغانى
ده اللى مفروض يحصل

4 comments:

Marianne_N said...

Leelo I am impressed ... hahhahahaha asl ana delwa2ti in the Saloon Marriage phase ... so I started writing about "The Curse". How to find your other half and your sould mate. ana 3agabny 7etet en la el regala regala wala el banat banat, actually sometimes they cross roles. Lovely article Leelo now i will go and read part one of it

موقع نادى الزمالك تيم said...

كلامك عين العقل يا مان

Dr. Hala Hashad said...

للمزيد من المعلومات حول خدمات كايا الخاصة بالعروس، زوروا جناح كايا في معرض الزفاف المميز الذي يقام في الفترة ما بين 4 – 7 مارس 2009 في مركز إكسبو – الشارقة، وفي معرض الزفاف المميز الذي سيقام من 9 – 11 أبريل 2009 في مركز دبي الدولي للمؤتمرات والمعارض.

الدكتورة هالة حشاد
(عيادة كايا)

tas flowrance said...

تمام كلام جميل جدا جدا