6.12.05

الناس مش طايقة روحها

أنا: عبد المنعم رياض يا اسطه

السواق: (يهز دماغه دليل الموافقه - هو راجل عجوز وبدقن بيضا)...... أمشى من التحرير ولا الكورنيش؟

أنا: زى ما تحب، اللى تشوفه

(مشينا شوية فى اتجاه التحرير، ثم فى آخر لحظة جاله هاتف داعى انه يطلع على الكورنيش، فمن وسط الاشارة قدام المجمع، راح ضارب شمال لولبى وكسر على تلات اربع عربيات كده وانطلق ناحية عمر مكرم وطالع عالكورنيش وهو فى منتهى السعاده)

أنا: (بصوت واطى مش قاصدة اسمعهوله) بس دى كده لفة كبيرة

السواق:(بحدة) ايه؟ نعم بتقولى ايه؟

أنا: (ايه انا عكيت ولا ايه!) لا أبدا يااسطه دانا بقول كدة حتبقى لفة

السواق: لفة! لفة ايه، مين قال اتها لفة، دى كدة أقصر، بدل ما نقف فى ميت اشارة، قال لفة قال.....واتفتح ومش عايز يقفل

أنا: طب خلاص، مادام حضرتك عارف (آه صدقونى بقوله حضرتك)، أصل أنا معرفش الطريق ده

السواق: طب انتى متعرفيش، أنا عارفه، ولو اللفة أطول دى تبقى عليا، مش حادفعك أزيد، دى عليا أنا (الحدة عماله تزيد - يادى النيلة، ماركبش غير مع سواق سايكو مش طايق روحه)

ثم سكت أنا .. هو بقى ماسكتش، لما وصلنا عبد المنعم رياض بسرعة من الطريق بتاعه، شمت فيا!! وأصر يوضحلى قد ايه هو ناصح

السواق: شفتى بقى، لا لفة ولا حاجة، ادينا وصلنا، قعدتى بس تقولى لفة ومش لفة!! ادينا وصلنا

أنا: (نسيت أقول انى كنت راجعه من جاردن سيتى من عند الجدع بتاع تقرير الاكسل و واخدة جرعة فقع مش بطالة) أنا قلت لحضرتك أول ما ركبت سوق من الطريق اللى يريحك

السواق: مانتى قعدتى تقولى لفة و..... وقعد يبرطم

أنا: (ابتاديت اتنرفز) مانا سكت خلاص

السواق: ماهو كان مفروض تسكتى من الأول
!!!!!!!!!!!!

أنا: انت حتربينى ولا ايه

السواق: انتى اللى حتربينى عشان راكبة بفلوسك
!!!!!!!!

أمال يعنى حركب تاكسى وأدفع لب وسودانى، ولا انت عامله عمل تطوعى

وسكت تانى عشان هو راجل كبير وقلت أكيد فى راكب قبلى طلع عينه أو عنده مشاكل عائلية.... والحمد لله كنا وصلنا، ودفعتله الفلوس بمنتهى الأدب ومشيت وأنا بقول: لا حول الله يا رب، الناس مش طايقة نفسها

14 comments:

Alexandra said...

بحيكي أنك قادرة تكتبي حاجة عادية وبسيطة بشكل ممتع كده

Lilli said...

متشكرة يا ألكسندرا
ده سببه مرض مزمن عندى وهو التركيز الزائد عن اللزوم فى كل حاجة
:))))))

honeybee0608 said...

el tarkiz 7elw ya lilli..bas sada2ini el tarkiz fel balad di zeyada 3an el lezoum msh kwayes 3shan se7etek :) esma3y kalamy w kabary ktiiiiiir, el balad di 3ayza 7ad demaaa3' awy zay sawa2in el taxi kda lol..
el 7aketih el 7a2i2a bey2ool en baladna brdo fiha 7agat msh ay 7aga y3ni.. kol marra bterkaby fiha ma3 sawa2 taxi is an experience in itself w kessa !

Eman M said...

كلهم كدة، أنا كرهت التاكسيات و سواقين التاكسيات، كلهم مرضى نفسيين و علطول مش طايقين نفسهم
توب علينا يا رب

Lilli said...

بس ساعات بيبقى فيه سواقين محترمين أوى، أنا فاكرة مرة أيام الكلية ركبت مع سواق شاب صغير، لما عرف انى رايحه هندسة عين شمس، ولسه بحاول أوصفله الطريق، قاللى: لا لا أنا عارفها، ما أنا متخرج منها
:D
احترمته أوى الصراحه، مش عشان بس مهندس (أصلى عندى عقدة المهندس) انما عشان لقى ان التاكسى أحسنله من وظيفة مش جايبه همها، ومتكسفش يبقى سواق

ezabi said...

"كلهم كدة، أنا كرهت التاكسيات..."
حرام عليكي يا ايمان، ماهو برضه مش ذنبهم تماما، يبقوا طول النهار طالع عينهم في القرف والزحمة المتعمدة أحيانا، اكيد لو لاقوا نفسهم في جو ومعاملة مختلفة حيتصرفوا بطريقة تانية.
منهم لله السبب في كده.

سامية said...

أحلى مثال لوصف حالة سواقين التاكسي بغتاتتهم وغلبهم وعذابهم وكل حاجة فيهم حلوة ووحشة هي أغنية العربجية لسيد درويش. ح احاول أجيب كلماتها بالضبط.. فعلا كل ما باسمعها بافكر في سواقين التاكسي وألاقيهم بيصعبوا عليَّ

Timmy said...

hi lilli
rakba taxi leah ????????
2omal feam zooka :D

Lilli said...

da so2al wageeh fe3lan... maho ana kont rakba zooka bas raknaha fe garage 3abd el men3em reyad.. 3ashan in garden city no way u can find a parking.. so i park in the garage and take a taxi from and to the company i'm going to... el 7ekayat beta3et el sherka de 3ayza blog lewa7daha... kefaya a2olak en they have been a "Potential" Customer for over 2 years now!! wala shofna menhom labeyad wala eswad!!

نحو الهدف said...

فعلا الناس مش طايقة روحها
و ما بتصدق أي موقف تطلع فيه كل انفعالاتها اللي اتراكمت من القهر و الكبت و العيشة و اللي عايشينها

بس برضه سواقين التاكسي دول حكاية لوحدهم ، و لو اني بعذرهم في حبهم للرغي لأن شغلهم بيحتم عليهم طول النهار يبقوا في العربية ، بتهيألي لو مكلمش الزباين هيتجنن
أنا عن نفسي بطنش أي تعليقات أو محاولات فتح مواضيع و ابص للطريق و اسرح ، و غالبا السواق بيفهم و يعرف ان مفيش امل و يسكت :)

Ahmed Shokeir said...

ماهوه إنتي غلطانة برده .. حد يعمل كده بالذمة ، بتعدلى على سواق التاكسي ..طب لعلمك ده راجل طيب إنه عده الموضوع على كده بس .. ياعالم ماكل واحد يخليه فى حاله الدكتور دكتور والمنجد منجد والقاضى قاضى عشان الفاضى مايعملش قاضى

KING TOOOT said...

الناس كتير مساكين مخنوقة و مكروبة
عايشين و من حواليهم الدنيا مخروبة
عشان كده خلقهم دايما ً فى مناخيرهم
و كأن أحساسهم مزنوق فى أنبوبة
و عـجـبـى
KING TOOOT

Lilli said...

ماهو انا فعلاً استاهل الضرب
المرة الجاية لو سألنى السواق رايحة فين حقوله: أى مكان يعجبك ياسطه... اللى تشوفه سعادتك يا باشا
ولو طلع على اسكندرية ولا مشى من عند المقابر حتى مش حافتح بقى
توبة
:)))

الرباعية فى محلها يا توت
(Y)

maged mostafa said...

بالنسبة لموضوع التاكسيات ده...أنا عارف أن في سواقين ولاد (.....) بس في سواقين بيبقو مفقوعين طول النهار و بيبقى الواحد حظه السيء انه يركب مع حد فيهم...يعني على سبيل المثال أنا ركبت مرة مع سواق تاكسي كان لسه متخانق مع زبون في القسم بسبب الأجرة....بس الغلط كان على الزبون..الراجل ركب من عند هارديز اللي في الخليفة المأمون..و نزل في أخر النزهة الجديدة...وإدى السواق 3 جنيه و سابه و مشي (الأجرة الصح حوالي 6 جنيه)...السواق اتنرفز..و نزل يتخانق..الزبون قاله مش عاجبك هنروح القسم..راحو القسم..و طبعا الزبون طلع غلطان...و دفع الباقي...بس بعد ما شل السواق و عصبه و ضيع له ساعة و نص من الورديه الللي صاحب التاكسي بيستنى ايرادها منه...طبيعي واحد زي السواق ده لو ركب معاه حد بعد حادثة زي دي انه ياخد منه موقف حتى لو مش قاصد.......

lilli:
"kefaya a2olak en they have been a "Potential" Customer for over 2 years now"


law 2asdek 3ala sherket elta2meen eyaha beta3et garden city....menhom lil allah....sherka fa2r...we kol ma7ad yero7lohom ya2emma yetbahdel fe el mowaslat, ya2emma tekoon fe tashreefa, mozahrat, matar, etc. we ba3d dah kolloh "Potential Customer"...7aga te2ref :/