20.12.05

!مش أنا قـلـت

ما هو أنا قلت قبل كدة عايزة أبقى باندا ومحدش صدقنى
أهو النهاردة فى الأخبار جابوا خبر عن احتفال بالعيد ميلاد رقم 25 لباندا فى حديقة حيوان فى الصين، وجايبين فيديو للعيد ميلاد!! والباندا قاعدة مرحرحة فى البيت بتاعها وفى بنت صينية بتلاعبها وملبساها طرطور وبتأكلها تورتة فى بقها!! ومصورين كتير بيصوروا الاحتفال وطلعت الحفلة فى التليفزيون كمان ومش فى الصين بس لكن فى كل دول العالم
مقارنة صغيرة بين عيد الميلاد ده وعيد ميلادى أنا ال25 نلاقى من غير مجهود إن الباندا تكسب
أنا عايزة أبقى بانداااااا

10 comments:

Mohamed Yousef said...

3eeb kedda ya leeloo
geeh el zaman 2ellee 2el wa7ed feeh beyboss lel PANDA fee Rez2aha.... :-)

Ahmed Shokeir said...

مش هاتصدقي . والله وانا بقرأ الخبر إمبارح فى الجرنان إفتكرتك

كان فى جريدة الشرق الأوسط

Lilli said...

مش كده برضه يا أحمد
أصل أنا افتكرت عيد ميلادى أنا ال25 اللى ماحدش صوره ولا بكاميرا منافيللا حتى

ياللا حظوووووظ

انا الذي يمشي في الظلال said...

بس خلي بالك هما مهتمين بالباندا اوي كده عشان اعدادهم قليله... قربوا ينقروا يعني
علي العموم كل سنه و انت طيبه و لو انها متاخره شويه

Lilli said...

وانت طيب
ماكانش من بعيد يعنى
;)

KING TOOOT said...

مهما كان فى مهرجانات و أعياد و فلوس
مهما الناس كانت واقفة تحضن و تبوس
عمر الأنسان أو الحيوان أو أيا ً كان
ممكن يفرح و يحس بعيد لو كان محبوس
و عـجـبـى
عرفتى ليه بقى أنتى عيد ميلادك ال25 كان أحسن ميت مرة من عيد ميلادها ؟؟
KING TOOOT

Lilli said...

نظرية برضو
لكن فى لفظ كدة مش حلو أوى بس بيعبر عن الباندا مووت اسمه "الأنتخة" ومعناها الواحد يقعد ويريح ومافيش على باله أى حاجة وياسلام على ساندويتش وعصير
Typically a panda :)))
دى مش شخصيتى خاااااالص
I'm too far from this mood, that's why i sometimes imagin myself being this way :D

Maged Mostafa said...

أنا في رأيي إن الموضوع مش حلو بالنسبة للباندا و لا حاجة لأنها غالبا مش فاهمة إن اللي حواليها ده حاجة عشانهاهي....إلا بالنسبة للتورتة طبعا

Taher said...

فيه حاجة انت ناسية ان الباندا دى فى الصين
يعنى احمدى ربنا انك مش باندا لانك فى مصر
كنت حتتبهدلى ولا حتلا قى اللى يرميلك جزر حتى مش توورته

Lilli said...

hahahahahahahahaaa

فعلاً كنت حبقى باندا غلبانة أوى تايهه فى الشوارع وبتمسح ازاز العربيات فى الاشارات
ولو يعنى من الباندات الواصلة وعايشة فى جنينة الحيوانات كان زمانى جالى أنيميا من قلة الأكل ، أصل مافيش بامبو فى مصر أصلاً
:p