كل عام وأنتم بخير

و ما يحلاش العيد طبعاً من غير شوية هيافة
بس المرة دى مش على روتانا، لكن على التلفزيون المصرى العريق
السنادى بقى قرروا ان لازم نخرج من القوالب الثابتة والفقرات النمطية فى العيد، بدون فقد خط الهيافة الأساسى و مع الاحتفاظ بمضمون الهبوط
وكانت المفاجأة، المفاجأة الكبرى
وبعد طول الانتظار
جابوا المادة الخام نفسها
جابوا "هايفة"... هو الفن العربى جاب إلا هايفة يا خواتى
يا روحى يا روحى يا روحى يا روحى

هايفة (أنا قاصدة أكتبها كدة) بشحمها ولحمها فى القناة الأولى
يا خواتى
الشعب المصرى المتقندل يتهيألى مالوش حجه بعد كدة عشان ينبسط
جابوله هايفه تانى يوم العيد
أوصف ايه بس ولا ايه

ابتدى بلبسه اللى كان عبارة عن حاجة كدة من فوق، ما بين قميص نوم وبيبى دول، فكرنى بمشهد من فيلم تايتانيك لما

الأم كانت عمالة تقطع فى نفس روز بالكورساج وتشد، وتشد عشان خصرها يبقى نحيل كدة ولا الغزال، وتقولها انها لازم تتجوز الجدع اللى مش طايقاه ده، اظاهر المشهد ده أثر قوى فى اللبيس بتاع الفنانة هايفه فقرر يلبسها زي روز، ونسى انه كان ملابس داخلية! ما علينا
وعلى الحاجة دى كانت لابسة بنطلون بيجامة أخوها الصغير وشاحطاه لغاية كتافها
يا خواتى عالشياكة

المذيع النحنوح والمذيعة المسهوكة ابتدوا يسألوا أسئلتهم الفتاكة بقى وهايفة بتجاوب كأنها بتدلى ببيان هام فى الأمم

المتحدة
شوية وسألوها عن المجوهرات اللى لبساها وهل من تصميمها ولا لأ (قال ايه عاملة كولكشن مجوهرات من تصميمها) فبدأت يا روحى تعرض علينا كل المجوهرات اللى لابساها حتة حتة وتقول ايه من تصميمها وايه هديه، وجت على الخاتم الألماظ الضخم وقالت انه هدية من واحد "عزيز" عليها قوى ولابساه مخصوص فى البرنامج عشان عيون الننوس
واحنا برضو نفرحلك يا حبيبتى يوم ماتلاقى ابن الحلال اللى يستاهلك

شوية وطلبوا منها تغنى اغنية للشحرورة! ناقصة هيا... المهم غنت بصوتها المغرد أغنية "عالبساطة"، وبعد كدة غلطت غلطة عمرها الفنى وغنت رائعة فيروز "بكتب اسمك" بصونها الحنين، وأشكر الظروف اللى خلتها تغنى مقطع واحد بس... الحمد لله رب العالمين
شوية كدة مركزتش فى الكلام، ولما رجعت أركز، لقيتهم بيقولوا ان أوبرا وينفرى مرشحة لجايزة نوبل للسلام (صحيح ده؟) عن جهودها ضد الايدز باين فى أفريقيا وكل الأنشطة الانسانية اللى بتعملها، وانها قال ايه اختارت هايفه عشان تقدمها فى الحفلة اللى تستلم فيها الجايزة

ستوب بقى
أوبرا وينفرى وعارفين انها فعلاً ليها أنشطة زى كدة وست آخر مجدعة
ايش جاب بقى هايفه للعمل الخيرى؟ دى حتى معملتش اعلان من بتوع مستشفى السرطان للأطفال، حد بس يقوللى ايه أنشطة الآنسة الخيرية؟

بصوا أنا اعتراضى على هايفه مش لسبب غير انها مختصرة نفسها فى كونها جسد جميل بس
هى فعلاً جميلة، جميلة وذكية، بس كمان كام سنة، الجمال ده حيروح، ومحدش حيتقبل دلعها ده

وبكدة بيقى العيد فرحة، وأجمل فرحة
والشعب المكبوت شاف حتة حلوة عالعيد، حتى لو طلع بعديها بهدل فى بنات الناس فى الشارع
كل عام وأنتم بخير