17.11.05

سلام لأحلى بنات

مش عارفة ليه افتكرت الحكاية دى امبارح... حكاية عبيطة كده من خامسة ابتدائى!! أه خامسة ابتدائى، أصل أنا فاكرة كل سنين المدرسة دى سنه بسنه ويوم بيوم، أصلها كانت بجد أحلى أيام حياتى، وعشان كمان كنت هاديه أوىىىى أيامها، اللى ميعرافونيش أيام المدرسة يمكن يستغربوا الكلام ده، بس فعلاً كنت هاديه بزيادة، ما كنتش عمرى أتكلم فى الفصل ولا أتشاقى.. بس كنت مركزة فى كل حاجة بتحصل حواليا، المهم انى كنت من الناس اللى بيتقال عليهم شاطرين، والمدرسات كانوا بيحبونى، أنا شايفه انى كنت كده كده حبقى هاديه خلقة ربنا.. مش عشان ابقى شاطرة ولا الميس تبقى مبسوطة منى ولا بتاع، المهم ان تركيزى الصامت ده خلانى فاكرة كل أيام المدرسة الجميلة
المهم، مرة فى خامسة ابتدائى غبت يوم، و زى ما كنا متعودين اتصلت بواحدة صاحبتى فى التليفون أسألها أخدوا ايه وأنا غايبة وإذا كان فى واجبات.. فالبنت قالتلى على كل حاجة و قالت كمان ان مسز نصار (مدرسة الانجليزى) قالت لازم نجيب معانا كتاب معين واللى حتنساه حتتزنب.. بس مش عارفه ليه أنا طنشت وما أخدتش الكتاب.. يمكن نسيت، يمكن كبرت أو يمكن الكتاب كان تقيل وما كنتش عايزاه يتقل الشنطة!! المهم انى رحت بمنتهى الثقة من غير الكتاب
كانت تانى حصة عندنا مسز نصار، وأول حاجة عملتها انها سألت مين ماجبتش الكتاب!! مدرسات كلية رمسيس دول مابينسوش حاجة أبداً... المهم انى زى الشطورة وقفت واتزنبت على الحيطة، كنت مضايقة قوى قوى، ليه ماجبتش الكتاب، دى صاحبتى قالتلى فى التليفون، وفضلت زعلانة وأنا وشى فى الحيطة، أصلاً أنا ماكنتش متعودة على حكاية التزنيب دى.. حسيت بإهانة فظيعة، دانا من أوائل الفصل، ايه الفضايح دى
بس اللى حصل كان حاجة غريبة أوى: لقيت مسز نصار بتنده عليا وتقوللى: انت واقفة ليه؟ قلتلها نسيت الكتاب... قالتلى مش انتى كنتى غايبة، خلاص اقعدى! يا فرج ربنا... بس أنا بقى مش اتنيل أقعد واحط لسانى فى بقى، لأ.. رحت قايلالها بصوت واطى ومتهته: بس أنا كنت عارفة اننا لازم نجيب الكتاب... بالذمة دا كلام، الست كتر خيرها قالتلك اقعدى، خلاص عاجباكى الواقفة يعنى، وحسيت انى عكيت
الأغرب من كدة بقى ان مسز نصار قالت: "انتى بنت شاطرة، مش مشكلة مرة، البنات الكويسة ممكن نفوتلهم مرة" يا سلااااام أما انتى ست بنت ناس فعلاً، كتر خيرك ويعمر بيتك وينوره قادر يا كريم... دا كان فى بنات تانيه متزنبه وأنا الوحيد اللى قعدتنى، قشطة :)) كرامتى رجعتلى
المرة دى بقى جريت على الدسك بتاعى وقعدت وأنا وشى ضارب أحمر، بس قلت جوايا ان فعلاً كون الواحد يبقى كويس وملتزم ممكن ينفع فى يوم من الأيام... ومن يومها وأنا بموت فى مسز نصار، اهى برضه ادتنى برستيجى قدام الناس ، خصوصاً رضوى اللى كنت بتنافس معاها على الأولى بتاعة الفصل :))) رضوى دى من أعز صديقاتى بس كانت تحب تبقى الأولى دايماً، أنا الصراحة حكاية الأولى دى ماكانتش تفرق معايا كتير، بس كنت أحب أزرزر رضوى:) ياسلام كانت أيام تحفة
الحمد لله أصحابى بتوع المدرسة لسه على اتصال بيهم كلهم واللى دخلوا هندزة معايا منهم كانوا تمانية غيرى، فكانت الكلية ونس من أول يوم، وفى قسم كمبيوتر كنا خمسة من كلية رمسيس مننا احنا التسعة
سلام لأحلى بنات

3 comments:

Mohamed Yousef said...

3ala fekra ya leeloo....matez3aleesh mennee...bass 2ana 2a3adt 2ad7ak 2awee wana batkhayelek metzannebaa....mesh 2asdee 7aga tab3an..... :)

Sherry said...

3arfa ta lilian you reminded me of the best teacher i have ever had in my life which is mrs nassar this woman was a human being not a teacher. I had an incident with her myself and she was so kind and considerate betare2a malhash 7al.One of the few people who i remember at this school and say Alah yer7amha, i wish my kids have a teacher half of what this woman was one day.
and by the way i remember how really quiet u were and i was really puzzled when u started this rcg group mainly becuz i had the impression that u were so quiet that u will never start this thing :D but u proved me wrong and am glad u did :)
keep it up chatty

Lilli said...

thanks Sherry... but Mrs. Nassar is alive! why did u say Allah yer7amha???????? I think u r mistaking her for someone else, Mrs. Nassar, the mother of Nermine Nassar our class mate. I visit school from time to time and the last time a saw her was like a year and a half ago she was there and she told me to go fetch a husband :D