9.11.05

آه يا بلد

فى العادى مش باحب أحكى فى السياسة وأحوال البلد والحاجات دى، لأنى مؤمنة ان المواضيع اللى الواحد مالوش سيطرة عليها أو مالوش قرار فيها، يستحسن ما يتكلمش فيها.. يعنى الانتخابات و الفساد و التعصب .. كل الحاجات دى بتجبلى احباط لو ناقشتها لأن التفاصيل مش واضحة والناس القائمين عليها ناس مش "تمام" وماحدش يقدر يغيرهم غير اللى خلقهم بس
ما عدا موضوع واحد بسسسسسسس هو اللى مجننى ومش قادرة اسكت بقى!! السواقة فى مصر، و رغم انى برضو ماليش سيطرة على سلوك السواقين اللى حواليا، بس خلاص مش قادرة استحمل.... اهو الواحد ينفس شوية، و بعدين ده موضوع فعلا مأثر عليا لأنى باسوق كتير فى اليوم الواحد... على الأقل ساعة يوميا.. ده الأقل، انما ممكن أسوق فى يوم واحد 3 أو 4 ساعات على حسب
بيبدأ اليوم السعيد وأنا رايحة الشغل بمحاولة خطرة للطلوع على صلاح سالم، اللى هو من المفروض يكون طريق سريع، دول حتى كتر خيرهم شالوا كل الاشارات منه. طيب بقول المفروض انه طريق سريع بس موظفين الجهاز المركزى الاعزاء ماحدش قاللهم كده! كمية أتوبيسات وعربيات وتاكسيات واقفة فظيعه.. ده غير اللى يكسروا يمين فجأة عشان ينزلوا مدام عنايات بتاعت شئون العاملين، واستاذ شوكت جاى مع جوز بنت عمته فالازم برضو ينزل قدام باب الجهاز ذات نفسه، آه أمال ايههى طلعة صلاح سالم دى اللى بأبدأ بيها اليوم، حته ماتخدش غير ربع دقيقة أخدها أنا فى عشر دقايق، ماشى ... يا مسهل
أكمل شوية وأبدأ أجيب التالت (مانا كنت ماشية أول تانى) بس عند مدخل شارع الطيران - وبالتحديد عند نفق عبور المشاه، أفاجئ بناس كتير كتير اللهم اجعله خير، بتعدى صلاح سالم!! طب ما النفق أهو... لأ ازاى، ده حتى شوية الأكشن بتوع الصبح دول مفيدين للمشاه... طب دول المشاه، انما أعمل ايه فى أعزااااااااااااائى سواقين الميكروباصات اللى بيعملوا لنفسهم محطات عجـيـبة، أولهم عند شارع الطيران (آآآآه عشان كدة ناس بتعدى كتير، أول مرة أفهمها) وتانيهم عند أول وآخر نفق العروبة أو بيقولوا عليه نفق الريس! وبعد كدة محطات كتير تانى مش حافظاها - بس أشهرهم فى العباسية، عند مطلع الكوبرى!! أيوة مطلع الكوبرى اللى هو الدنيا أصلا بتبقى زحمة لدرجة الموت والاستشهاد! انما على مين، تلاقى واقفة ميكروباصات ومينى باصات وعربيات مدارس ومصالح حكومية السواقين مزواغين بيها وعاملنها مواصلات عامة - آه يا بلد
فى معلومة مهمة ودى حاجة حقيقى وهى ان كل الميكروباصات فى القاهرة ملك ظباط شرطة عشان كدة هما طايحين، والسواقين اللى عليها يبقوا ناس كانت مقبوض عليها أو كانت فى السجن والظباط مشغلنهم عليها - أظن كدة مفهوم
نرجع تانى لطريق الشغل اليومى، ومن المعروف ان فى قاعدة فى السواقة عندنا بيقول نصها: "اللى عربيته أحسن أو أشيك أو أغلى لازم يعدى الأول" وطبعا القاعدة دى مش دقيقة، طب لو عربيتين نفس الموديل ونفس السنة، مين يعدى؟ قالك لو واد روش سايق واحدة ومدام غشيمة سايقة التانية لازم الواد الروش يعدى.. طب لو بنت حلوة؟ قالك لأ كدة الواد الروش يعديها هى الأول، أهو برضو يعرف يبص كويس كدة، طب لو الواد الروش عربيته مش قد كدة، قالك ده بقى يعتمد على مهاراته الشخصية، وفى اسلوب مشهور اسمه الزفلطة، يعنى يفضل يحشر نفسه بين العربيتين اللى قدامه لغاية ما واحد فيهم يخاف على عربيته ويوسع حته، قوم الواد الروش يتزفلط و يعدى بسرعه..مع تطبيق القاعدة السابقة عليا أنا، يتضح ان عزيزتى زووكا اللى هى عربيتى، مش حتسترمعايا فى موضوع الموديل والشياكة، فاللى بيحصل ان جميع الماركات الأخرى، بدءاً من المرسيدس وال بى أم دبليو وحتى الصينى الضايع!! بيجلهم حالة تشنج وهرش لو فضلوا ماشيين ورايا! ويدولى كلاكسات ونور ويقرفونى، مع انى بابقى ماشية على 70 أو 80 والرسمى فى صلاح سالم 60انما بقى ازاى مرسيدس مثلا تمشى ورا زووكا.. لو أنا طنشت يقرفنى نور وكلاكسات، ولو وسعتله أفضل متغاظه، فحسب المزاج بقى ممكن مرة أطنش، مرة أوسع، أهو زى ماتيجى
ملحوظة هنا انى لو كنت متوضبة كدة شعر وماكياج والنضارة الشمس الإوعى، بأعدى بمنتهى السهولة ومحدش يكسر عليا!! يعنى أتوضب للسواقين فى الشارع، ياسلام سلم
بس فى ناس تانية مسلية قوى، الناس اللى مش بتقهم يعنى ايه اشارات: دول بقى روقان، عادة بيبقوا ستات، أصلهم فاكرين انها ديكوراشن فى العربية، فى منهم ناس متعصبة شوية ومعتقدين انها حاجة قليلة الأدب، أو انها نوع من الدلع انك تقول أنا داخل شمال الجاى يا جماعه ... المهم ان اللى مش فاهم اشارات أكيد مش فاهم انت عايز ايه، اللى بيحصل انى أدى اشارة يمين قبل الشارع اللى داخلاه، المدام الغشيمة بقى اللى على يمينى تلاقينى باسرع، تروح شده معايا نظام يعنى "أنا أجدع منك" أروح أنا مهديه عشان أعديها ألاقيها هى كمان هدت!! أشد أنا تشد تانى... يووووه ارحمينى
ونفضل كدة لغاية ما الشارع بتاعى يعدى أو أضطر أكسر عليها فى الآخر، وهى كل ده فاكرانى باناطحها فى السواقة - هو فى حد يقدر عليكى يا جبارة
طبعا فى حاجات تانية مفروغ منها زى التاكسيات اللى بتقف فى أى وقت فى أى حته فى أى منطقة فى الشارع، يعنى ممكن فى نص الشارع، أو على الشمال أو فى ملف، مافيش أى مشكلة، و لو هو راجل محترم شوية يشاورلك بايده بمعنى "اصبر شوية الدنيا ماطارتش" وعقبال ماتحاول تطلع منه، يكون هو ركب الزبون ومشى، لأن طبعا ماحدش حيديك فرصة تطلع منه
وفى كمان المناديه اللى بيطلعوا من تحت الأرض، ولما أروح مشوار اشترى حاجات طبيعى انى أركن كذا مرة فى منطقة صغيرة، كل ركنة مطلوب منى المعلوم حتى لو وقفت دقيقتين وبدون أى مساعدة من المنادى ده ... وساعات تلاقى راجل بسيط ماشى فى الشارع، شكله رايح يشترى عيش فينو وجبنه للعيال، ولما يلاقيك بتركن، فجأة بقدرة قادر يتحول لمنادى، ومش بعيد يطلع صفارة من جيبه و يفضل بقى يقوللك: "كمان كمان، أيوه اعدل بقى" وهو ولا شايف ولا فاهم يعنى ايه اعدل اصلاً، بس أهى محاولة، يمكن يطلع منك بتمن العيش الفينو

أنا عارفة ان مافيش حاجة حاتتغير لما أكتب ده، بس الشوارع فى مصر بقت فعلاً مرعبة ... الله يكون فى عونا

3 comments:

Lilli said...

ta7'od balak men el madamat el 3'asheema .. wel bahawat elli 3alatool maskeen mobiles we beyetkalemo feha.
we ta7'od balak men 3asaker el esharat elli beyshawro dayman 3aks el eshara mahy menawara: lawo 7amra ye3adeek we lawo 7'adra yewa2afak!!

Ahmed Shokeir said...

إسمحيلي أهنيكي .. البوست بتاعك تحفة ... لغتك الساخرة عالية جدا وهايلة

Lilli said...

أشكرك بشدة يا بشمهندس :))
هو الظاهر ان فعلا فى هم يضحك.. أنا قلت بدل ما أتنكد كل مرة أسوق فيها، أخليها مادة سخرية و تريقة... شكرا تانى مرة